Niyə Almaniyada Stomatoloqlar Üz-çənə cərrahiyyəsi rezidenturasına qəbul ola bilməz?

Əvvəlki  Almaniyada Uzman diş həkimi - Fachzahnarzt və  Almaniyada Rezidentura (Oral cərrahiyyə) məqalələrimda səthi toxunduğum mövzuya bugün ətraflı aydınlıq gətirməyi düşündüm. 

Bakıda Stomatologiya fakültəsindən məzun olmuş bütün həkimlər Üz-çənə cərrahiyyəsi üzrə rezidentura keçmək hüququna malik olduğu halda təəssüf ki Almaniyada bu mümkün deyildir. 

Almaniyada Üz-çənə cərrahiyyəsi (Mund-Kiefer-Gesichtschirurgie) üzrə rezidenturaya qəbul ola bilməyiniz üçün 2 (iki) Diplom təhsiliniz olmalıdır (Doppelstudium) - Müalicə işi və Stomatologiya. İlk dəfə mən də eşidəndə təəccüblənmişdim hətta bu sahə üzrə rezidentura keçmiş həkimlərin CV`lərinə baxdıqda həqiqətən real olduğunu gördüm. Bir statistikada rastlaşdım ki, Almaniyada bu sahədə işləyən həkim sayı 1800 nəfərin altındadır. 90 milyonluq ölkə üçün bu çox az bir rəqəmdir.

Müalicə işini bitirmiş həkimlər əgər universitetdə yer olarsa Stomatologiya fakültəsinin 2-3 kursunu oxumaqla Stomatologiya Diplomu da ala bilərlər. Təəssüf ki, əksi mümkün deyil. 

Lakin "Oral cərrahiyyə" üçün yalnız Stomatologiya üzrə Diplom kifayətdir. Oral cərrahiyyə üzrə rezidenturanın 3 ilindən bir ili mütləq Mund-Kiefer-Gesichtschirurgie şöbəsində keçilməlidir.

Azərbaycanda iki Diplom təhsilinizi bitirsəniz belə Almaniyada hər iki Diplom üçün Approbation almağınız şərtdir. Bir sözlə Üz-çənə cərrahiyyəsinə gedən yol 2 qat çətindir. 

Bəs Üz-çənə cərrahiyyəsi ilə Oral cərrahiyyə arasında fərqlər nədir?

Üz-çənə cərrahiyyəsi (MKG): Üz-çənə bölgəsində daha mürəkkəb əməliyyatlar və xəstəliklər - Le Fort qırıqların bərpası, bədxassəli-xoşxassəli Tumor, Damaq yarıqları, Sinus, Tüpürcək vəzi, çənə oynağı əməliyyatları, Phlegmone, Abszess, Osteomyelitis kimi iltihabı əməliyyatlar, üzdə qəzalardan sonrakı yaralanmaların estetik bərpası, ortoqnatik cərrahiyyə və oral cərrahiyyəyə aid bütün əməliyyatlar, İmplantologiya və s. 

MKG Rezidentura 5 il davam edir və onun 3 ili stasionar, 2 ili isə Ambulator olmaqla 1 il Ümumi cərrahiyyə və ya Anestezologiya və ya Burun-Boğaz xəst. (HNO) və ya Neyrocərrahiyyə şöbəsində rotasiya edilməlidir. 

Oral CƏRRAHİYYƏ (OCH): Ağızdaxili və alveolar əməliyyatlar - Diş Transplantasiyası, reimplantasiya, ağıl dişlərinin çəkimi, hemiseksiya, tumorrezeksiyası, implantologiya, Sinus, sinuslift, Osseointegration, CMD, retrograde endodontiya, Gummy smile, dodaqkorrektur,  Frenulum linguae, Abszess, Kökucu rezeksiyası, Parodontitin cərrahi müalicəsi, biopsiya, kistektomi əməliyyatları və s. 

OCH Rezidentura 3 il davam edir. Onun 1 ili MKG şöbəsində rotasiya edilməlidir. 

Yuxarıda hər sahəyə aid çox az nümunələr çəkdim hər iki sahənin əhatəsi daha geniş və bir-birinə bağlı olduğunu qeyd etməliyəm.

"Azərbaycanda və ya digər ölkələrdə Üz-çənə cərrahiyyəsinin rezidenturasını bitirmiş biri kimi Almaniyada işləyə bilərəm?" soruşsanız - bunun üçün Approbation aldıqdan sonra bitirdiyiniz rezidentura programınızın Alman programı ilə Zahnarztekammer tərəfindən müqayisəsi edilir. Əgər mövzularda heç bir defisit olmazsa, Rezidentura diplomunuz tanına bilər və ya sizin sadəcə təhsil illərinizi tanımaqla Facharzt Prüfung edə bilərlər. Lakin Müalicə işi diplomunuz olmayacağı üçün "Oral Chirurgie" işləyə bilərsiz.